فزیک د ژوند د حرکت او پرمختګ بنسټ

لیکنه: حنان حبیبزی 

فزیک د پنځ یا طبیعت د رښتیاوو حقیقت ژبه ده؛ دا علم موږ ته ښيي چې نړۍ څنګه کار کوي، څرنګه انرژي بدلېږي، او ولې هر څه په یوه نظم او توازن روان دي. له هغه وخته چې انسان د لمریزې رڼا، باد، او جاذبې په ښکارندو یا پدیدو پوه شو، د فزیک وموندل شو، خو فزیک له هغه وخته شته وو چې له کوم وخت الله تعالی دا کاینات جوړ کړل. فزیک نه یوازې د طبیعي قوانینو د درک وسیله ده بلکې د بشري ژوند د پرمختګ تر ټولو مهم بنسټيز توکی ګڼل کېږي.

په ورځني ژوند کې فزیک له موږ سره هره شېبه ملګری دی. کله چې موږ تګ کوو، خبرې کوو، یا یو شی پورته کوو، د فزیک د حرکت، ځواک، او انرژۍ ارونه یا اصول په کار اچول کېږي په بله وینا په عمل کې راځي. د برېښنا څراغ، ګرځنده ټلیفون، ګاډی، الوتکه، راډیو او ټلویزیون، دا ټول د فزیک د اصولو پایلې دي، ان د روغتیا په برخه کې د ایکسرې، MRI، او لېزر درملنې ټکنالوژي د فزیک له علم څخه سرچینه اخلي. فزیک د ژوند عملي بڼه ده ځکه چې پرته له فزیکي پوهې، انساني ژوند د تیارو په څېر لنډ ګنډ یا محدود پاتې شي.

فزیک د بشري تمدن د هر نوي پړاو خوځاند یا محرک ځواک دی. د صنعتي انقلاب له بخاري ماشینونو نیولې، د برېښنا، الکترون، اتوم، او تر فضایي سفرونو پورې، هره لاسته‌راوړنه د فزیک له علم سره تړاو لري. نن ورځ د فزیک په مټ موږ کولای شو په ثانیو کې له یوې وچې څخه بلې خپل غږ ورسو، او له یوچاسره خبرې وکړو، د باد انرژي په برښنا بدله کړو، د لمر انرژي په برېښنا بدله کړو، او د کایناتو ژورتیا وڅېړو. فزیک موږ ته دا وړتیا راکړې چې پنځ یا طبیعت نه یوازې وپېژنو بلکې له هغه سره د هوښیار چلند یا تعامل لارې هم زده کړو.

 فزیک د ژوند د دوام، پرمختګ او پوهې ریښه ده. دا علم موږ ته دا درک راکوي چې نړۍ په تصادفي توګه نه ده رامنځته شوې بلکې په دقیق نظم او توازن ولاړه ده. د فزیکپوهنې له لارې انسان کولای شي د الله جل جلاله د مخلوقاتو عجیبې بیلګې او پیچلتیاوې او پراخوالی درک کړي ځکه د فزیک هر قانون د الهی حکمت یو نښه ده. فزیک موږ ته زده کوي چې علم یوازې د پوهې لپاره نه بلکې د انساني ژوند د ښه والي لپاره یو الهي امانت دی. 

فزیک د الله تعالی یو لوی نعمت دی، له موږ سره د ژوند په پرمخ بیولو کې مرسته کوي. فزیک هغه مهال الله تعالی له خوا جوړ او په کایناتو کې کېښوول شو چې کله الله تعالی دغه کاینات جوړ کړل. خپله د اسمانونو او ځمکې او څه چې پکې دي فزیکي عناصر دي. د وریځو خوزښت، د لمر تاوو یا ګرمي، باد، د انسان حرکت، خبرې، د ګاډو یا موټرو، الوتکو، څارویو، انټرنیت او ټیکنالوژۍ، دا ټولې د فزیکي ځانګړنو څخه برخمنې او د فزیکي ځانګړنو له کبله کړنې ترسره کوي. او فزبک د نړۍ په پرمختیایي چارو کې ډیره ونډه لري. 

موږ په افغانستان کې فزیک ته اړتیا لرو چې پرمختګونو وهڅوو. که موږ په عصري زده کړو باندې بندیزونه ولګوو، هیڅکله به افغانستان مخته ګام اخیستلی ونشي، او له پرمختګ څخه به بې برخې پاتې شي، او له بیوزلۍ څخه به ونه وځي.