د بلک واټر مشر د څه شي خبرداری ورکړ....؟

حنان حبیبزی 

د سولې او جګړې متن او بیان یا د Paece and War Narrative غوراوای په بیوزلو او مخ په ودې هیوادونو کې د امریکا په لاس کې دی‌، دې پورې اړه لري چې څه د امریکا په ګټه دي، همغې خوا لومړی د امریکا د دولت له خوا بیانیږي بیا ددغو هیوادونو د مشرانو له خوا چې ددولتي فساد له کبله د امریکا مرستو ته ناست دي.

 په افغانستان کې هغه سیاستوال چې ترپرونه یې ویل لوی لوی بمونه پرې واچوی نن د سولې خبره کوي، ځکه چې امریکا سوله غواړي، که امریکا د جنګ خبره وکړي نو دوی به هم د سولې په ضد وغږیږي. دغسې سیاستوال نشي کولی چې د هیواد حالات له جګړې څخه سولې خواته بوځي، همدا لامل دی چې امریکا متحد ایالات مخامخ له طالبانو سره خبرې کوي.

 یو بل دلیل یې دادی چې په تیرو اتلس کلونو کې د نړیوالو مرستو سره سره چې په هره برخه کې د رغاونې په نیت شوي د افغانانو په ژوند کې بدلون نه دی راغلی بلکې حالات نور هم خراب شوي دي. 
 د هیواد ډیری خلک چې په کلیوالو سیمو کې اوسیږي، نه یوازې له بیوزلۍ ښکته پوړ ته تللي بلکې له نا امنۍ او ناروغیو او لوږې له کبله یې ژوند له خطر سره مخامخ دی، پاکو اوبو او پوهنې ته هم لاسرسی نلري چې دا یو ستر بشري ناورین دی. 

په تیرو کلونو کې افغان دولت ددې ستونزو د له منځه وړلو لپاره هیڅ کار نه دی کړی، ټول تمرکز يې په شپینیو علمیاتو وو چې ډیرځلې يې ملکي خلک د ماشومانو او ښځو په ګډون نښه کړي.
 نو کله چې تیر کال د امریکایی تلویزون یوې خبریالې د نژدې دوه لسیزو مالي او بشري لګښتونو جاج واخیست نو هر څه د هیلو خلاف او سرچپه وو.
 ولسمشر اشرف غني ورته وویل چې په ارګ کې محاصره دی او که د امریکا مرستې ورسره نه وي شپږ میاشتې به يې حکومت دوام ونکړي.

 کله چې ولسمشر ترمپ په افغانستان کې په تیرو اتلس کلونو کې د میلیونو ‌‌‌‌‌‌ډالرو راپور وغوښت د جنرالانو د جګړیز دریځ سره سره یې پریکړه وکړه چې له طالبانو سره سوله وکړي او خپل عسکر له افغانستان څخه وباسي. 
په افغانستان کې د امریکا لپاره دا جګړه ډیره درنده او له سرګردانۍ ډکه ده، له یوېخوا کورني فشارونه، له بلېخوا په افغانستان کې د طالبانو مقاومت او د چین او روسیې ننګونې چې په افغانستان کې د امریکايي پوځ د پریشانۍ لامل ګرځي. 
له بلې خوا د امریکا ترڅنګ د وینیزویلا هیواد چې د تیلو او غازو او نورو قیمتي کاڼو د زیرمو په لرلو سره له سعودي مخکې دی لاهم د روس پلوي سیستم په ولکه کې دی. د خلکو ژوند يې په امریکايي رسنیو کې له بیوزلۍ سره مخامخ ښوول کېږي، امریکا غواړي چې هلته رژیم بدل کړي.
 ولسمشر ترمپ هوډ لري چې د وینیزویلا خواته لاړ شي چې له یوې خوا لږ لګښت پرې راځي د ټرانسپورټ او د پوځونو د شمیر له پلوه او له بلې خوا امریکا ته د تیلو او غازو د سترو سرچینو ولکه په لاس ورځي، که وغواړي له خلیجي هیوادونو څخه يې د تیلو له وارداتو څخه بیغمه کوي. بل برازیل دی چې د ولسمشر ترمپ پام يې ځانته اړولی دی. 

اوس چې د بلک واټر مشر دالجزیرې تلویزون ته وویلې چې دې کې شک لري چې راتلونکو ټاکنو کې به ولسمشر غني بریالی شي یوغیري مستقیم سیګنال دی چې امریکا نور ولسمشر غني نه غواړي. بلک واټر دامریکايي جنګیالیو یو شخصي امریکايي شرکت دی چې د وسلو له کمپنیو سره نژدې دی او مشر يې د ایف بي ای او سي ای اې د باور وړ دی.

 په دې کې ښايي د تجارتي جګړې مساله مطرح وي چې بلک واټر غواړي په افغانستان کې یوه ا‌‌‌‌‌‌‌ډه ورکړل شي، ښايي دا مساله له طالبانو سره د خبرو پرمهال هم رامنځته شوې وي خو طالبان ددې منلو ته چمتو نه دي. ولسمشر غني هم چمتو نه دی او افغان ولس خو بالکل بهرني ځواکونه د هر نامه لاندې نه مني، نو سولې ته هیله من اوسی د ټولو په ګټه ده.