ټاپي پروژه: د سیمې اقتصادي راتلونکي لپاره یو تاریخي ګام
لیکنه: حنان حبیبزی
د الله په نوم چې ډېر مهربانه او ډېر رحم والا دی
نن د ترکمنستان-افغانستان-پاکستان-هندوستان (TAPI) د ګازو نللیکې پروژه په رسمي توګه پرانیستل شوه چې د سیمه ییزې همکارۍ او اقتصادي پرمختګ لپاره یو مهم او تاریخي ګام ګڼل کېږي. ددې پروژې د پرانیستې مراسمو کې د افغانستان د اسلامي امارت لومړي وزیر ملا حسن اخوند د سیمې د ټولو اړوندو هېوادونو لوړپوړو چارواکو ګډون کړی و.
TAPI به د ترکمنستان د ګالکینیش په نوم د ګازو له زېرمو څخه افغانستان، پاکستان او هندوستان ته هر کال ۳۳ میلیارده مکعب متره ګاز ورسوي چې دا به د جنوبي آسیا د انرژي اړتیاوې په زیاته کچه پوره کړي.
افغانستان چې د څو لسیزو جګړو له امله اقتصادي ستونزو او کاري اسانتیاوو له کمښت سره مخ دی، ددې پروژې په پرانیستل کېدو سره د اقتصادي بیارغونې نوې هیلې راټوکیدلې دي. د TAPI پروژې پرانیسته به په افغانستان کې زرګونه کاري فرصتونه رامنځته کړي، او هر کال به افغانستان ددې پروژې له ترانزیت څخه شاوخوا ۴۰۰ میلیونه ډالر ترلاسه کوي. دا به د افغانستان لپاره یوه لویه اقتصادي لاسته راوړنه وي چې د سیمې په ټیکاو او پرمختګ کې به هم مرسته وکړي.
پاکستان او هندوستان، چې دواړه د انرژۍ له کموالي سره مخ دي، ددې پروژې له پرانیستې وروسته به دغه دوه هیوادونه د انرژي د اړتیاوو په پوره کولو کې لویه مرسته ترلاسه کړي. ددې پروژې پرانیسته د افغانستان له ټيکاو سره ډيره زیاته مرسته کوي، ددې لپاره چې د سیمې هیوادونو ته ددې اقتصادي سرچینې ساتل یو مهم کار وي. دغه دواړه هېوادونه په اقتصادي برخه کې د TAPI له لارې کولی شي د انرژي په برخه کې له اوږدمهاله ستونزو څخه وژغورل شي، او په دې توګه به د سیمې په کچه یو لوی اقتصادي بهیر رامنځته شي.
په ټوله سیمه کې د TAPI پرانیسته د یو نوي خو ستر اقتصادي څپرکي پیل ګڼل کېږي. دا پروژه نه یوازې د انرژۍ لېږد لپاره یو لوی ګام دی بلکې د سیمه ییزې همکارۍ او سولې لپاره هم یو مهم سمبول دی. TAPI به د سیمې هېوادونه اقتصادي پیاوړتیا ته ورسوي او د نړیوالو اړیکو په ښه کولو کې به هم یو مهم رول ولوبوي. تر ګردو مهم به په افغانستان، پاکستان او هند کې ښه کاري شرایط برابر کړي.
Comments
Post a Comment