مایک تایسن او د یوتیوبر جېک پال ترمنځ سیالي: سپورت که سوداګري؟

الله په نوم چې ډېر مهربانه او ډېر رحم کوونکی دی

لیکنه: حنان حبیبزی 

مایک تایسن چې د باکسینګ د نړۍ یو نوموتی شخصیت دی د خپل وخت ستر اتل و، له یوتیوبر سره د یوې ځانګړې سیالۍ لپاره رینګ ته ستون شو. دا سیالي ظاهرا د تفریح او شهرت لپاره جوړه شوې وه، د خلکو پام يې ځانته واړاوه، خو په همدې وخت کې یې د سپورټ په اصل او ارزښتونو شکونه هم پیدا کړل. د سیالۍ لپاره ټاکل شوي انعامونه چې بایلونکي ته یې څلوېښت میلیونه ډالر او ګټونکي ته شل میلیونه ډالر په پام کې نیولي وو، ددې څرګندونه وکړه چې دا یوازې یوه سوداګریزه هڅه وه، نه د سپورټي مهارتونو ریښتینې سیالي.

د دې سیالۍ بنسټیز هدف یوازې د اقتصادي ګټو ترلاسه کول او د دواړو ګډونوالو شهرت زیاتول ښکاريدل چې په ځانګړي ډول یوټیویر ته یو ډول د نوم نښان بازارموندنه ګڼل کېږي. مایک تایسن چې ښایي له اقتصادي ستونزو سره لاس او ګزیوان وي، ددې سیالۍ له لارې د خپل ژوند په بیا جوړولو تمرکز کړی وو، په داسې حال کې چې د یوتیوبر لپاره داد شهرت او بازار موندنې یوه لویه وسیله وه. ددې سربیره ښايي مایک ټایسن یو کتاب هم ولیکه، یا له ټي وي چینلونو څخه میلیونو نور ډالر ترلاسه کړي، خو امدیښنه داده چې دا ډول خپللاسې سیالۍ د سپورټ برم ته زیان رسوي ځکه چې په دې کې رښتینواله له منځه ځي.

مایک تایسن که څه هم شاوخوا شپیته کلن دی، خو لا هم د هغه د وړتیاو او ځواک ځانګړې بېلګه په سپورټ کې پاتې ده. تایسن نه یوازې پخپل وخت کې یو بېسارې اتل و بلکې نن هم د هغه جسمي وړتیا، ذهني پیاوړتیا او د باکسینګ وړتیاوې د نورو لپاره د لارې مشال ګڼل کېږي. هغه خپله وړتیا او رښتینواله په داسې ډول ښودلې ده چې د تاریخ په کتابونو کې د تل لپاره ځای لري.

په اوسني عصر کې د داسې اتلانو کمښت احساسیږي چې د تایسن په څېر د زړه، دماغ او بدن په پوره همغږۍ سره سیالي وکړي. د تایسن د ګذارونو ځواک او د جګړې تکتیکونه یې داسې دي چې د هغه په وړاندې درېدل د هر نوي نسل لپاره یوه لویه ننګونه ده. د هغه مینه وال تل وايي چې تایسن یوازې په فزیکي ځواک کې نه بلکې په زړه کې هم یو اتل دی ځکه چې هیڅکله د سیالۍ ډګر ته یوازې د پیسو یا شهرت لپاره نه و ننوتلی، بلکې د باکسینګ د هنر د ښکلا لپاره یې مبارزه کړې ده.

د تایسن په څېر شخصیتونه د سپورټ هغه برم ښيي چې یوازې د سخت کار، زړورتیا او ریښتینو هڅو له لارې ترلاسه کېدای شي. هغه تر اوسه هم د نړۍ خلکو ته دا پیغام ورکوي چې رښتینواله او وړتیاوې تل تر ګردو لوړ ځایګی لري. د هغه په څېر د یو بل زوی راوړل ښایي د تاریخ د هر پېر لپاره یوه ستره غوښتنه وي.