د سعودي د سفارت پرانیسته؛ فرصتونه او ننګونې

 

د سعودي سفیر 

لیکنه: حنان حبیبزی

په کابل کې د سعودي د سفارت بیا پرانیسته، د یوه داسې څپرکي په څېر ښکاري چې پکې ګڼ رازونه او فرصتونه نغښتي دي. دا ګام نه یوازې د نړیوالو اړیکو په ډګر کې د نوي پیل زېری ورکوي بلکې د افغانستان پر سیاسي، اقتصادي او کولتوري فضا هم ژوره اغېزه لرلای شي.

 سعودي چې د مکې او مدینې په څېر سپېڅلې سیمې لري نو د نړۍ د مسلمانانو زړه ته لاره لري. د دې سفارت بیا پرانیسته د یوې داسې دروازې پرانیستل دي چې له هغې څخه د نړیوالو اړیکو تودې هیلې راټوکیدای شي.

یو فرصت؛ د نوي پیل ژمنه

دا منظره د افغانستان لپاره دومره مهمه ده لکه سهار چې د لمر وړانګې د غرونو له څوکو څخه راښکاره شي او ددښتو پر پراخوالي خپله تودوخه وغوړوي.  پوښتنه داده چې څنګه ددې سفارت پرانیسته د افغانستان لپاره د اقتصادي پرمختګ دروازې پرانیزي. سعودي چې د تېلو د زېرمو له پلوه بډای دی، کولای شي چې د پانګونې او زیربنایي پروژو لپاره یو لوی فرصت رامنځته کړي. د کابل بازارونه ښایي د سعودي د سوداګرو له خوا د نوې نخشې ترلاسه کړي، او د افغانستان کلي او ښارونه د پرمختګ په لور حرکت وکړي. ځکه سعوديوال د شتمن هیواد په لرلو سره لیواله دي چې په افغانستان کې اقتصادي فعالیتونه ولري. 

د ننګونو غر؛ د احتیاط اړتیا

خو بل اړخ ته، دا منظره د څپاندو سیندونو په څېر هم ده چې که په پام سره ورسره چلند و نه شي، د خطرونو څپې يې شاوخوا سیمې په اوبو ډوبولای شي. سعودي چې د امریکا یو سیاسي همکار دی  په سیمه کې دامریکا د ګټو لپاره ښايي ونډه واخلي.   دا وضعیت ښایي د افغانستان ناپيیلی سیاست زیانمن کړي، او د سیمه‌ ییزو هېوادونو لکه ایران او روسیې حساسیتونه را وپاروي.

په داسې حال کې چې د سعودي سفارت پرانیسته د افغانستان لپاره یو زرین فرصت ښکاري، خو دا هم مهمه ده چې د دې اړیکو په اداره کولو کې له تدبیر او ژورو تګلارو کار واخیستل شي. افغانستان، چې اوس د خپل برخلیک یوه حساسه څپه وهي، باید د هرې دروازې پرانیستلو سره د خپلو ملي ګټو او خپلواکۍ بېرغ لوړ وساتي. دې منظرې ته له ورایه کتل اړین دي، ترڅو د فرصتونو غوټۍ د وږو خلکو په لاس کې ګل شي، نه چې د نوو ننګونو لپاره پلمه شي.